الثلاثاء، 8 مايو 2012

وقـــال بيقولــو محجبــات


كاسيات عاريات
 باجانب اهى متأثره
وقال بيقولو محجبات
ولابسين جيبه قصيره
سيبك من كل اللى فات
فى خُصله باينه فى شعرها
ده اترحم كل اللى مات
عشان مشافش اللى جرى
لو من قبره طلع وفات
هيشوف بعينه المسخره
من غلبه يقول للبنات
انا مش شايف غير العرى
معقوله كل دى بضيهات
وقَليل بنات متخمره
يموت روحه م العياط
عشان البنات متغيّره
لا واللى غطى كمان وزاد
مش حاسه فى دينها مقصّره
ودينّا غير كل الديانات
ولا هيا حاسه مقدّره
وبتتشبه بالولاد
لا وكمان متعطره
لو قولتلوها القلب مات
عليكو تروح متشطره
وتقول لكو التزمو السكات
لردودها هيا محضّره
لو وقت التوبه منها فات
راح تموت متكدره
بقلم نسمه عزت

هناك 7 تعليقات:

ضياء عزت يقول...

بتتكلمي في موضوع مهم يا نسمة ويطول النقاش فيه
وانا ساعات زيك بستغرب بنات محجبة وعاملين حاجات غريبة.. بس ف الول والآخر همه حرين ومالناش نحاسبهم :)


اسلوبك حلو

بس بيني وبينك من غير زعل .. ممكن يكون أحسن

وانتي أكيد تقدري تعمل كدة

بالتوفيق دايما إن شاء الله

Emtiaz Zourob يقول...

تناولتي موضوع كبير بكلمات بسيطة وقريبة من القلب ..

أحسنت عزيزتي .. استمري .

أحمد أحمد صالح يقول...

عبرتي عن الموضوع المهم جدا ده بكلمات بسيطة جدا و معبرة جدا..احيكي عليها..و دايما في انتظار جديدك..تحياتي

Hebatullah يقول...

بصراحة جسمي قشعر

nesma ezzat/نسمه عزت يقول...

اشكركم على تشجيعكم ليا وعلى زيارة مدونتى
بالنسبه للاستاذ ضياء عندك حق طبعا وكلنا لسه بنتعلم بس حضرتك قولى اقرأ لمين او اسمع مين لانى خلصت دواوين كتيره جدا احمد فؤاد نجم صلاح جاهين وبيرم التونسى وغيرهم

ضياء عزت يقول...

القراءة مابتخلصش يا نسمة.. مش معنى إني قرات دواوين كتير ابقى عملت اللي عليا..
اقرأي كل حاجة وأي حاجة.. ومش في الأدب بس.. ده لو حبيتي طبعا

واقصد باسمعي إنك تسمعي شعرا بيلقو شعرهم زي تميم البرغوثي أو هشام الجخ أو عبد الرحن يوسف وده هيخليكي تقدري أكتر تحافظي على الأوزان والتفعيلات

وحتى كلماتك انتي اسمعي نفسك وانتي بتقوليها.. هتحسي أماكن الكسور وهتعرفي تظبطيها

أنا مش بنصح يا نسمة لأني أحسن منك لا سمح الله.. وحتى ماتعتبريهاش نصيحة لأني مش أهل ليها وأقل كتير من إني انصح أي حد

بالتوفيق دايما

nesma ezzat/نسمه عزت يقول...

اشكرك يا استاذ ضياء وان شاء الله عند حسن ظنكم