الثلاثاء، 8 مايو، 2012

رباعيه لا بخاف الضلمه


لا بخاف الضلمه ..ولا بخاف الموت
بس الامان ......... ده مهوش موجود
ايه السبب!!..............مين السبب!!
قولت الظلم............... ساد الوجود
ياسيدى!!
بقلم نسمه عزت
وانتظرو كتاب ربــاعيــات قريبا ان شاء الله

وقـــال بيقولــو محجبــات


كاسيات عاريات
 باجانب اهى متأثره
وقال بيقولو محجبات
ولابسين جيبه قصيره
سيبك من كل اللى فات
فى خُصله باينه فى شعرها
ده اترحم كل اللى مات
عشان مشافش اللى جرى
لو من قبره طلع وفات
هيشوف بعينه المسخره
من غلبه يقول للبنات
انا مش شايف غير العرى
معقوله كل دى بضيهات
وقَليل بنات متخمره
يموت روحه م العياط
عشان البنات متغيّره
لا واللى غطى كمان وزاد
مش حاسه فى دينها مقصّره
ودينّا غير كل الديانات
ولا هيا حاسه مقدّره
وبتتشبه بالولاد
لا وكمان متعطره
لو قولتلوها القلب مات
عليكو تروح متشطره
وتقول لكو التزمو السكات
لردودها هيا محضّره
لو وقت التوبه منها فات
راح تموت متكدره
بقلم نسمه عزت

رباعيه عاتبت الدنيا ع الهموم


عاتبت الدنيا ع الهموم........................ وكنت منها زعلانه
قولتلها امتى تحسى فى يوم............... ع جرحى تبقى ندمانه
قالتلى ليه تشتكى ..............................ده العند مش سكتى
بقت من يومها بجرحى انا .................................ولهانه
ياسيدى!!

بقلم نسمه عزت
وانتظرو كتاب رباعيات قريبا ان شاء الله

رباعية شوفت الفرح صدفه



شوفت الفرح صدفه فى يوم. . . . .جريت واديتو عنوانى
قولتلو تعالى زورنى فى يوم. . . . .. قولتلو اوعى تنسانى
وأدى الفرح. . . . . . . . .. . . . .. . . . . لحد اليوم ماجانى
انا قولت ده منى هرب . . . . . . . اتاريه ضاع منه عنوانى
ياسيدى!!


بقلم نسمه عزت
وانتظرو كتاب رباعيات قريبا ان شاء الله

الأحد، 6 مايو، 2012

شبيك لبيك


مالك بيا قولتها مره لـ جان
لما ظهرلى فجأه
 فجأه من وسط الدخان
قاللى انا جاي اسعدك
قولى طلبك مهما كان
بربشى هتلاقى حلمك
بقى حقيقه ده انا مرجان
كل طلباتك مجابه
وبزياده عليها كمان
قولى قصرمعاه جنينه
بدل الجنه تلاقى جنان
قولتلو عايزه حبيب
صادق من جواه انسان
قاللى طلبك صعب اجيبو
طلبك ده ملوش عنوان
قولتلو ازاى بقى
هو انت مش بردو جان
قاللى الصدق ده طبع نادر
مش موجود فى اى انسان
قولتلو ياريتك ما جتنى
ده كان املى من زمان
يبقى ليا حبيب يصونى
يحمي من غدر الزمان
قاللى ياريتو كان بايدى
انا دورت ف كل مكان
بس مكدبش عليكى
مفيش دلوقت ده كان زمان
بقلم نسمه عزت

الجمعة، 4 مايو، 2012

يا خساره الاربع حروف



معلـــــش فـــلت منى الحـــرف
معلش كانت لحــــــظة ضــــعف
بشــــوق اجــــرى اقول له بحبك
ملاقيش الا شفــقه وعـــــــــطف
ياخساره الاربـــــــــــع حروف
حرجونى وملونـــــــى كسوف
يعنى اروح لـــــــــه اقوله بحبك
ويقولى ده انا عنـــــــدى ظروق 

إدّانــــــــى الامل بزيـــــاده
حسسنــــى ان حبه عبـــاده
لو اعاتبه واقول له حـــــــرام
يتهرب بقى كالــــــــــعاده
ويقول غيّرى المـــــــوضوع
وطريقى معاه مقـــــــــطوع
غلّبنى وحيرنى معــــــــــاه
وياريت كان بايدى رجوع

وال آه فى الحب بتوجع
وبتاخد ولا عمرك تشبع
حرمان بحرمان بقى يالله
انا هبعد عنه وايه يمنع

بقلم نسمه عزت

اقلعينى من حشاكى

باللهجه الصعيدى

اقلعينى من حشاكى
صدقينى مهيش قضيه
وزعى شربات فراقى
واسقى كل الخلق ديا
افرحى بضحكك غناكى
شمِّتى كونك ده  فيا
قطّعى قصة هوانا
اصل دورى كان ضحيه
ماتخافى يأسى وعذابى
علمينى قسوه ظلم
ضيعى عمرى وشبابى
قولى حضنى ماراح يضم
علمينى اكون شبيهك
نخله كويانى وقويه
لما يهوى حد قلعِك
تخرجى منه عتيّه
لما ينوى حد دبحِك
قدمى له سلاح هَديه
وتقوليلو ان نَصْلَك
مستحيل يخدش ابيّه
علمينى كل حاجه
قولى ليا كلام يفيد
كيف اكون قاسى وشَديد
كيف ابان فى عز جرحى
كانّى لسه عريس جديد
قولى ليا كل حاجه
كل نصحك راح يفيد
بقلم نسمه عزت

الخميس، 3 مايو، 2012

بيخاف عليا م الفرحه


فى عز همومى انا بضحك

عشان متبانش احزانى

وانادى بكره انا بعندى

واقول له هات هموم تانى

وامدح زمانى انا بردو

كريم اصله. . ياما ادّانى!

وكل مجايبو عجبانى!

وياما حققلى فى امانى!!
.
.
بيخاف عليا م الفرحه

وحالف انه ما يجيبها

وعشان بالحزن انا برضى

كتب ع اليفطه ده نصيبها!

وايه يمنع؟مفيش مانع

هات مانا خدت ع الاحزان

وشيلت همومى انا فى اوفّه

ملزمانى فى كل مكان

وان حد راح يصرخ عنك

انا خايف ينقسم ضهرك

اشكر فيه واقول ميرسى

واكمّل سكتى وحدى

لكن بدموعى على خدّى

وع الاحزان تانى اعدّى

تشبط فيا وتنادى

وتقول خدينا وحياتى

شيلينا معاكى فى الاوفّه

اقول اسفه ومقدرشى

وابعد عنها انا وامشى

لكن بردو متهداشى

تشد ف ايدى وقماشى

لحد ماشيلها فى الاوفّه

وأدى حكايتى مع الاوفّه

بقلم نسمه عزت

رافضه خضوعى



رافضه خضوعى ويا رجوعى

وانى اقيد له انا تانى شموعى

رافضه ضلوعه تضم ضلوعى

وانى اعيش وياه بدموعى

حاجات كتيره ياناس تعبانى

يغلط غلطتو ويعيد تانى

حاسه كأنه بيتحدانى

عتاب خلاص مش هعاتب تانى

خلاص تعبت كرهت زمانى

عايزه اتطلق قالها لسانى

لقيتو عمال يترجانى

عمال يقولى انا كنت انانى

حبيبتى مش اجرح فيكى تانى

"حبيبتى" رنت اوى فى ودانى

لقتنى بسامحه بكل كيانى

واقوله اياك بقى نبعد تانى

نظرة عينه ولمسة ايده

همس شفايفه مع تنهيده

نقطة ضعفى وهو عارف

بغلطه مهوش قلقان ولا خايف

حتى ولو كان جرحى انا نازف

اموره تعدى بقولة" اسف "

كلمه وسهله تحل له ازمه

تقيد له النور من بعد العتمه

ادى مشكلتى انا ويا حبيبى

كلمه تجيبنى وتودينى

بجد خضوعى ده بيأذينى

رافضه خضوعى

انا رافضه خضوعى

بقلم نسمه عزت